वेडात मराठे वीर दौडले सात
म्यानातून उसळे तलवारीची पात
वेडात मराठे वीर दौडले सात ....
ते फिरता बाजूस डोळे किंचित ओले
सरदार सहा सरसावूनी उठले शेले
रिकिबीत टाकले पाय झेलले भाले
उसळले धुळीचे मेघ सात निमिषात .....
वेडात मराठे वीर दौडले सात ....
आश्यर्य मुग्ध टाकून मागुती सेना
अपमान बुजविण्या सात अर्पुनी माना
छावणीत शिरले थेट भेट गनिमांना
कोसळल्या उल्का जळत सात दरियात
वेडात मराठे वीर दौडले सात ....
खालून आग, वरून आग, आग बाजुंनी
समशेर उसळली सह्श्त्र क्रूर इमानी
गर्दीत लोपले सात जीव ते मानी
खग सात जळाले अभिमानी वणव्यात ....
वेडात मराठे वीर दौडले सात ....
दगडावर दिसतील अजुनी तेथल्या टाचा
ओढयात तरंगे अजुनी रंग रक्ताचा
क्षितिजावर उठतो अजुनी मेघ मातीचा
अद्याप विराणी कुणी वार्यावर गात .....
वेडात मराठे वीर दौडले सात ....
